2026 жылғы 21 сәуірде Халықаралық білім беру корпорациясы (KazGASA) профессор-оқытушылар құрамының академиялық ұтқырлығы аясында Алматы технологиялық университетінде «Киім дизайнындағы креативті крой: конструкциялаудан коллекция жасауға дейін» тақырыбында дәріс өтті.

Дәрісті PhD, ХБК (KazGASA) Дизайн мектебінің қауымдастырылған профессоры Шайзаданова Г.С. өткізді. Іс-шара академиялық тәжірибе алмасуға және студенттердің заманауи киім дизайны саласындағы кәсіби құзыреттерін дамытуға бағытталды.

Дәріс барысында креативті кройды қолдана отырып киім жобалау мен дайындаудың заманауи тәсілдері, оның дәстүрлі әдістерден айырмашылығы, форманың рөлі және қазіргі дизайнерлік тәжірибелердің ықпалы қарастырылды.

Қатысушылар конструкциялау және модельдеу негіздерімен, бұйымды әзірлеу кезеңдерімен — идеядан техникалық іске асыруға дейін, сондай-ақ материалдарды таңдау ерекшеліктерімен және күрделі конструкциялармен жұмыс істеумен танысты. Қорытындысында коллекцияларды қалыптастыру және визуализациялау қағидалары ұсынылды.

Сапар аясында алынған білімді бекітуге және студенттердің дағдыларын дамытуға бағытталған практикалық сабақтар да өткізілді.

Академиялық ұтқырлықты жүзеге асыру жоғары оқу орындары арасындағы ынтымақтастықты нығайтуға, озық білім беру тәжірибелерімен алмасуға және дизайн саласындағы кәсіби қауымдастықты дамытуға ықпал етеді.