13 қазанда Халықаралық білім беру корпорациясының (KazGASA) Құрылыс мектебінің «Өнеркәсіптік және азаматтық құрылыс технологиясы» білім беру бағдарламасының 3-курс студенттері «Имсталькон» АҚ шақыруымен салынып жатқан ірімшік өндіру зауытының құрылыс алаңына танымдық сапар жасады. Аталған іс-шара студенттердің теориялық білімдерін тәжірибемен ұштастыруға, құрылыс өндірісінің нақты жағдайларымен танысуына және болашақ кәсіби қызметіне қажетті практикалық дағдыларын дамытуға бағытталды.

Сапар барысында студенттер құрылыс жұмыстарының негізгі кезеңдерімен, металл конструкцияларын монтаждау технологияларымен, құрылыс алаңындағы өндірістік үдерістерді ұйымдастыру ерекшеліктерімен және заманауи инженерлік шешімдердің қолданылуымен танысты. Сонымен қатар өндірістік нысанның құрылыс барысын бақылау арқылы болашақ мамандар құрылыс технологияларының тәжірибеде жүзеге асырылуын, инженерлік жобалардың орындалу ерекшеліктерін және құрылыс жұмыстарын тиімді ұйымдастырудың маңыздылығын тереңірек түсінуге мүмкіндік алды.

Осындай тәжірибеге бағытталған іс-шаралар білім беру үдерісінің маңызды құрамдас бөлігі болып табылады және студенттердің кәсіби құзыреттіліктерін қалыптастыруға, инженерлік ойлау қабілетін дамытуға, сондай-ақ құрылыс саласының заманауи талаптарына бейімделуіне ықпал етеді. Халықаралық білім беру корпорациясы (KazGASA) білім мен өндіріс арасындағы өзара байланысты нығайтуға ерекше мән береді және болашақ құрылыс инженерлерін сапалы даярлауға қосқан үлесі, ынтымақтастығы мен қолдауы үшін «Имсталькон» АҚ-на алғыс білдіреді.