2026 жылғы 13-14 мамырда Халықаралық білім беру корпорациясының (KazGASA) өкілдері алғаш рет Моңғолияның Ұлан-Батыр қаласында өткен Study in Kazakhstan халықаралық білім беру көрмесіне қатысты.

Іс-шара Қазақстан Республикасының жетекші жоғары оқу орындарын, Моңғолияның білім беру қауымдастығы өкілдерін, сондай-ақ екі елдің мемлекеттік және дипломатиялық құрылымдарын біріктірді. Көрмені Қазақстан Республикасы Ғылым және жоғары білім министрлігі, Моңғолия Білім министрлігі және Қазақстан Республикасының Моңғолиядағы Елшілігі ұйымдастырды.

Көрме аясында ХБК (KazGASA) өкілдері бакалавриат, магистратура және докторантура білім беру бағдарламаларын таныстырып, қабылдау талаптары, академиялық ұтқырлық, халықаралық бағдарламалар және шетелдік студенттерге арналған оқу мүмкіндіктері туралы ақпарат берді.

Келушілердің ерекше қызығушылығын сәулет, құрылыс, дизайн, инженерия және заманауи технологиялар бағытындағы білім беру бағдарламалары, сондай-ақ студенттік өмір, халықаралық жобалар және ХБК (KazGASA) оқу үдерісіндегі практикалық бағыттылық туралы ақпарат тудырды.

Екі күн бойы талапкерлер мен Моңғолияның білім беру ұйымдарының өкілдері университет өкілдерімен тікелей байланысып, оқуға түсу бойынша сұрақтарына жауап алып, ХБК (KazGASA) білім беру мүмкіндіктерімен танысты.

Көрмеге қатысумен қатар, ХБК (KazGASA) делегациясы Моңғолияның екі жетекші университеті — National University of Mongolia және Mongolian University of Science and Technology оқу орындарына барды. Кездесулер барысында академиялық алмасу, ғылыми ынтымақтастық және жоғары оқу орындары арасындағы халықаралық серіктестікті дамыту перспективалары талқыланды.

Study in Kazakhstan халықаралық көрмесіне қатысу ХБК (KazGASA) халықаралық позицияларын нығайту, серіктестік байланыстарды дамыту және қазақстандық жоғары білімді халықаралық деңгейде ілгерілету жолындағы маңызды қадам болды.